|
|
#1
02-03-2013, 01:52 AM
|
|||
|
|||
اكلات مكاوية
اكلات مكاوية
اسعد الله صباحكم بصراحة حلوة لهجة اهل مكة .. اللهم صلي وسلم وبارك على سيدنا محمد صبحكم الله بالخير والعافية قبل الكلام أبى أقول ممنوع دخول الناس اللي نفسهم رتعة واللي ياكلو بأطراف أصابيعهم الله يرحم الفطور الحلمنتيشي هادا المهم الواحد يفك ريقو ويتلبب بدل مايقعد جيعان وبطنو تكركر علين مايتركب الغدا الله يعز المكاوية كلهم والله ياجماعة مجتمعنا المكي مليان بالاكلات والاشياء الحلوة بس الناس هجرتها وفلتتها فطور زي هادا الفطور يمسك الجسم ويدي قوة وصحة وعافية مو زي دحين البزورة كلهم هفتانين ومضعفين وحتى الكبار كتير ناس مايفطرو وازا فكرو يفطرو على الخرابيط ( الله يعز النعمة ) قرمش وبطاطش وبيبسي فضلة خيركم جايبين اليوم فطور ولا في الأحلام زي منتو شايفين فاردين لكم صوفرة طويلة عريضة ودحين نعرفكم بالأكلات الموجودة وكل مين ياكل لقمة ويدوق يالله لاتتحشدو الوسع في القلوب وسمو بالرحمن قطر وطحينة طحينة بلدي يسووها بالسمسم اول حاجة يح**و السمسم م**وط بعدين يحطوه في المعصرة وينعصر والقطر اللي يسموه كمانة بعض الناس دبس هو زي ماتقولو عسل التمر انتو بالكم دحين لمن تشترو تنكة التمر تلاقو التنكة مدبكة وشيرتها من برا سودا جربو مرة وا***و باصباعكم الشيرة ودوقوها تلاقو نفس طعم القطر ودي من الاكلات الخفيفة واللي تلم العضم في ناس يحطو دمعتين سمن بلدي القشطة طبعا كانت طازة تجي كدة مبرومة وطخينة وبرضو كمان القشطة ناس ترش عليها عسل وناس سكر الشعيرية الجاوية تمباع اكياس صغيرة بريال لونها بني تجيبو الشعرية و تح**وها مع السمن البلدي والا أي زيت موجود عندكم صليتو على النبي وبعدين تحطولها قليل موية يسير تستوي شوية والا بدال الموية كاسة حليب تديها طعم وبعد ماتستوي يعني زي ماتقولو باقيلها شويتين ترشو عليها هيل طحون وسكر وان كان ناعم احسن علشان يدوب ومايقعد يقرقش حلاوة تركي مدري تعرفوها والاماقد سمعتو بيها جيبو صحن توتو غويط شوية حطو بطنو زيت وخلوه يقدح وبعدين جيبو دقيق فينو أبيض يعني وارموه على الزيت وقلبو الدقيق يمين شمال علين لمن يحمر بس وطو النار علشان لايلدع ويبان الطعم حق اللدعة لمن يتحمر الدقيق جيبو كاسة موية وحطو بطنها سكر وقلبوه م**وط وارموه على الدقيق وقلبوه م**وط وبسرعة علشان لا تلصق الحلاة بس وبعدين حطولها لوز بجلي والا **يب وفي ناس يحطولها زعفران يعني على حسب مراقكم الفول هادا ابو الفطور وشيء اساسي عند المكاكوة وكل بيت يتفنن في تحضيرو ناس ترش عليه سمن بري ويتبخر بالفحم وناس تحط عليه قليل قوطة وبصل وناس ليمون وفلفل مقطع دواوير صغيرة وناس بزيت الزيتون ومعاه طحينة وجمبو الكعك هادا رفيق الفول واللي مايحب يمشي حالو بالتميس المعصوب هادا ياحبايب يسووه بدقيق الحب يسوه اقراص صغيرة مدغبجة شوية وبعدين يدخلوها الفرن لحد ماتستوي بس ويندروها من الفرن وهي احارة بدخاخينها ويرموها في القدح ايشكلو القدح زي الجرة حقت الفول بس مقاسها صغير و**نوعة من الخشب يترمي بطنها اقراص عجينة الحب بعد ماتستوي وبعدين يرمو معاها موز ويالله يجيبو المدق زي السكين بس عريض شوية ويدقوه ويهرسوه علين يسير ناعم وطعامتو لمن يكون الموز كتير وناس تسويه بالقشطة والعسل وبعدين يرشو عليه السمن البري المطبق ايوة لاتستغربو المطبق اكلتو صباااااحي بس دحين قلبو الشغلة وخلوها في الليل اللي مايعرف المطبق عجينة يقصوها على شكل مربعات يسموها بطانة تكون متشلوطة على النار على خفيف وبعدين يفردو عجينة تربيعة كبيرة يسووها ويحطو في وسطها البطانة ويحطو عليها الخلطة حقت المطبق ( لحمة مفرومة على شويتين قوطة وكرات وبهارات ) ودحين طلعو شغلات جديدة في الحشوة في مطاعم تسوي بالتونة وبالجبن هادا المالح اما الحلو يسووه بالموز وناس بالجبن البلدي اللي يكون حلو وناس بالتمر وناس بالقشطة المهم يطبقو الاطراف حقتها من جميع الجهات ويرموها على صاج وقليل زيت يقلوها فيه الهريسة ايش هيا الهريسة عارفينها والا لأ يجيبو الحنطة يبلوها من الليل علين الصبحية ويحطوها في الهوند والا القدح اللي حكيتكم عنو في المعصوب ويدقوها بشويش علشان يطيرو القشر طبعا القشر مايترمي يمديكم تسو بيه شوربة بس تجيبو قدر تسلقو بطنو لحم بدون عضم وترمو عليه الحنطة علين لمن يستوي ويتهري طبعا اللي عندو معصرة والا مطحنة صغيرة يطحنها مع بعضها ويرجعوها للقدر ويكمروه علين تستوي وبعدين يحطوها في ال**ادي ويترش عليها سمن وقليل سكر بس السكر يلخبط الطعم علشان كدة كلوها بدون سكر بس هادي تسويتها صعبة وشغلاااااااااااااانة علشان كدة اشتروها من الغامدي وريحو بالكم هادي الأكلة تنفع في البراااااااااد تلم العضم هيا وكمانة أكلة تانية يسموها الحيسة بدقيق الدخن والتمر والعسل والسمن البري يخلطو شعبان مع رمضان علين تمسك حيلها م**وط يقدموها وياكلوها العصيدة وناكلها ايام البراد والا أي وقت تحبو تجيبو تمر( ولله الامر ) وقليل دقيق حب وناس تدردب وتمشي حالها بالفينو المهم تنخلط مع بعض طيب طيب وشمموها الحرارة قليل مع سمن بري او أي زيت موجود عندكم يعني التمرة تحطوها في قدر وقليل موية علين تنطبخ م**ووووط وتسير محلولة وبعدين ترمو الدقيق علين تستوي الكبدة وتوابعها أحسن نوع كبدة الجملي تغسلوها وتنضفوها وتقطعوها شقف طويلة ونحيفة بس وترموها على الصاج قلبتين والتانية وقيدكم غارفينها لأنو كل ماتقعد على النار تجحش وتسير قاسية زي الحجار حاشا نعمة الله وفي ناس تفرم بصل وقوطة وتكشنها وترمي عليها الكبدة وكم قرن فلفل وليمون والخل حقها للتحديقة من التوابع التقاطيع والقلوب والكلاوي وجمبها شوربة حب تنعنش القلب على قولهم الزلابية طبعا عارفينها حقت العيد بس هادي يمديهم يسووها في أي وقت مو شرط في العيد اللقيمات برضو كمانة معروفة يحطولها حبة سودة وشمر اللنقطة ناس تسمي اللقيمات لنقطة لكن اللنقطة تكون سادة مافيها لاحبة سودة ولا شمر بس دقيق وموية ورشتين ملح الدبيازة عاد مين مايعرفها دحين يسووها بالقمر الدين والقلادة والتين والمشمش ولوز بجلي وسن العجوز وسمن بري المعمول والغريبة ايوة هادا من الفطور المكاوي من نص القعدة علين اولات محرم يندروه في الصبحية مع الشاهي ولا كاسة حليب جمبها المعجون بالجزر برضو كمانة من الاكلات المكية بس مو مشهور عند كل الناس يجيبو الجزر ويبشروه بالرندا وبعدين ينطبخ على النار بعد مايشوحوه بالزيت ويحطولو حليب وسكر و**يب وهيل وزعفران برضو كمانة طعمو كلام كتير البيض هادا بكل أنواعه مخصص لفطور عارفين انواع البيض يالله قيدو عندكم بيض مطجن ينقدح الزيت وتفقشو البيضتين وتسيبوها شوية لحد ماتمسك حيلها وبعدين تقلبوها مع بعض ويسير البيض أوصال صغيرة بيض قرص تجيبو البيض وتخلطوه في **دية وتقلبوه علين يسير موية موية وبعدين تنكتوه في طاوة والا صينية يسير تقلبوه براحتكم من الجهتين بيض بالبصل جيبو البصل وافرموه وقلقلوه مع الزيت والفلفل الاخضر لمن يحمر البصل ارمو عليه البيض شكلو زي المجن بس الفرق في طعم البصل والفلفل البيض المسلوق خليني اسمع ماتعرفوه المهم لمن ترموه جوة القدر حطو عليه قليل خل وملح يسير مع الفوران مايتفقش البيض وحتى كمانة القشرة تندر قوااااااااام الشكشوكة شكشوكة بالقوطة تسوو كشنة قوطة مع البصل والفلفل علين تنطبخ وتتسبك ارمو عليها البيض وقلبوها علين يستوي شكشوكة بالكرات قطعو الكرات صوغار وارموه جوة الصينية لحد ماتنشف الموية حقتو وينكمش ويسير قليل بعدين ترمو عليه القوطة المقطعة اوصال صغيرة وكمانة صنو شوية لحد ما تنشف موية القوطة بس وارمو شويتين زيت وارمو البيض والفلفل الاخضر للتحديقة الحليب مع الشابورة وبرضو كمانة الحليب البقري ومعاه بيضة نية بلدي تنشرب على الريق الجبن البلدي والا المالحة والا الكشكبان دواير كبيرة كدة لونها احمر معد في منها دحين على ما اعتقد والزيتون وقليل ملح دقة طبعا الفطور اول كان بعد صلاة الصبح تقوم ست البيت علبال مايجي الرجال من الحرم هو وبزورتو يسير يفطرو سوا وهادا أيه على الضحوية ازاا جاعو يجيبو تميسة والا شريكة ويغمسوها مع الشاهي والا وصلتين جبن بلدي اللي يسمع يقول المكاوية ماهم الا بطنهم لكن ماشاء الله تبارك الرحمن اللهم صلي على النبي كلامكم م**وط علشان الاكل على اصوله وناس حلوة تفتح النفس على الأكل وكل شي طازة وبلدي مافي كيماوي ولا خرابيط هيا اقربها دحين البيض كدة طعمو ماتق مو خلي بالكم الديك مهو ديك زي حق زمان دحين يجيبو الدجاجة ومدري كيف يسووبها وترمي بيض قد ايش كترو 20/30 بالفقاصات مني دار يمكن يحبسو كل دجاجة مع خمسة ديوك علين يصرعوها وتجيب البيض هادا مني داري اول الدجاجة ان رمت 4/5 حبات كتر خيرها نعرف بيض حلال مو زي دحين حتى الدجاج انحرف ههههههههههههههه يالله ادعولنا دخيلكم من قلبكم دعوة حلوة ولكم زيها ان شاء الله في وداعة الرحمن للامانة منقووووووووووول
|
|
|
العرض الشجري