|
|
#1
03-26-2016, 05:54 PM
|
|||
|
|||
كفتة العدس
كفتة العدس
السلام عليكم ورحمة الله تعالى وبركاته اليوم حبيت نشارككم بوصفة كفتة العدس ممكن كاين لي مايعرفوهاش باش يتعلموها احنا من كنا صغار وامي ربي يحفظها ديرهالنا وعدنا نحبوا الغدس بهذه الطريقة أحسن من نطيبوه وهو حبات وامي تسميها كفتة الفقراء هههه والآن المقادير - رطل عدس الكمية تتحكمي فيها على حساب أفراد العائلة تقدري تديري أكثر - حبة فلفل حلو وحبة فلفل حار - راس ثوم - بصلة متوسطة - ربطة دبشة او معدنوس - بيضة صغيرة - شوية خبز مرحي - ملح+فلفل اسود+كسبر +كمون - زيت للقلي *بالنسبة لمرق التقديم - بصلة متوسطة - سنينات ثوم - طرف دجاج - حبة طماطم مرحية تقدري تستغناي عليها أنا نديرها علاجال البنة - توابل المرقة البيضاء كل وحدة كيفاش ديرها انا ندير كسبر وكركم - كمشة ح** - دبشة للتزيين انا ماكانتش متوفرة عندي *نبداو على بركة الله العدس تاعك تشمخيه ليلة من قبل تخليه يبات في الماء ليلة كاملة  وفي الصباح أغسليه جيدا وحاولي تقشريه وتنحيلوا قشوروا وطبعا راكي تغسليه مليح كم مرة ومن بعد قطعي معاه الفلفل والثوم والبصلة والدبشة وارحيه في الربو جيدا انا الروبو تاعي تحرق درتوا على طريقة ماما بكري تهرسوا في المهراس وتعاود ترحيه في الرحاية اليدوية وهاكا يشد الوقت   من بعد ماترحيه أضيفي بيضة صغيرة والملح والتوابل وهو هاكا راح تلقايه طلق الماء شوية أضيفي الخبز المرحي بشوية حتى تولي عجينة يسهل تشكيلها  شكليها كيما تحبي كريات او أصابع كيما أنا  ضعي زيت غزير كيما نديروا السفيريةوسخني الزيت جيدا واقليها حتى تحمار شوية عندك تحرقيها   *بالنسبة للمرقة قلي الجاج من بعد أضيفي البصل والثوم والطماطم المرحية والملح والتوابل تاعك قلي مليح وأضيفي الح** ومرقي وخليها تطيب في الأخير أضيفي أصابع الكفتة وخليها تغلي 05 دقائق أو أقل لوكان تطول في الغليان تتفتت وقدميها بالصحة والهناء   وتقدري تقدميها بلاصوص تومات او تقدميها وحدها مع السلطة على حساب اولادك واش يحبوا أنا شخصيا نموت عليها وحدها وهي مقلية ان شاء الله تعجبكم راني نسنى في ردودكم المشجعة 
|
|
|
العرض الشجري