|
|
#1
09-14-2015, 05:45 PM
|
|||
|
|||
روااااااااااائع ...........من مطبخ اسمهان 79
روااااااااااائع ...........من مطبخ اسمهان 79
السلام عليكم ورحمة الله وبركاته احلى تحية لاحلى لمة واحلى صحبة واحلى أعضاء موضوع اليوم مميز لانو يحتوي على اكثر من. وصفة الأساس فيها ثلاث خضر وفرماج مبشور (رابي) و فرماج طري الخضر هي حبة جريوات (قرعة) حبة جزرو حبة بطاطة  راح تقولو كيفاش هاذ الوصفات كلهم بهاذ المقادير وكيفاه الطعم والبنة يادرا واش احوالها ما تستغربوش في كل وصفة راح نعتمد في الأساس على هاذ المقادير واكيد في كل وصفة راح تكون إضافات واحدة اخرى تعطي بنة وذوق رااااااائع والاشكال اكيد مختلفة المطبخ فيه اسرارا اسرار فقط سيدتي كسري راسك شوية راح تخرجي ابداع والحلاوة كي تشوفي الرضى في عيون أهل بيتك صدقيني اختي الكريمة في كل اكلة راح تحسي بطعم مختلف رغم إنّو المكون واحد واللي اولادها ما يحبوش الخضر نتمنى هاذ الوصفات يعجبوهم ويدعيولي دعوة الخير ليا ولأهل بيتي طولت بالكلام يلا.........نبداو بأول وصفة بِسْم الله 1محشي الدجاج بالخضر   اول شيئ حضري المرق انا هنا استعملت اجنحة الدجاج تبلي المرق نتاعك ب شوية بصل ثوم مهروس ملح فلفل اسود افاح (راس الحانوت) زنجبيل مطحون توابل الكاري تمد طعم رائع 1م ص موطارد(الخردل) 1م ص فرينة معدنوس زيت قلي كلش مع بعض على نار هادئة ثم امرقي في هاذ الوقت ارحي نصف صدر دجاج او اكثر الكمية اللي تكفيك ارحيه مع الملح والفلفل الأسود والافاح والزنجبيل ًشوية موطارد ثوم شوية فرينة حضري حبة بطاطا مقشرة ومغسولة ومرابياوحبة جريوات مرابيا بلا تقشار وحبة جزر مقشرة ومرابيا حطيهم في مقلة ما تلصقش مع شوية زيت و **دة وحركي مرة على مرة فوق نار ذليلة حتى تذبل الخضر مليح وتحسيها طابت أضيفي عليهامعدنوس او دبشة طرف فرماج طري شاف او بربار وكمية من الفرماج المرحي فلفل اسود ثوم من الاحسن بودرة الملح لا ما تستعمليهش لانو المرق فيه الملح وكذلك الدجاج المرحي خذي شوية من الدجاج ضعي في وسطه الحشوة وشكلي كيما تحبي سجائر هلالات كورنيات انا شكلتهم شغل نصف دائرة ثم في الفرينة ومن بعد اقليهم يرجعو دوغي  لوحيها في المرق يكملو طيابهم خلي المرق يخثار اعصري شوية قارص وتمتعي بألذ طبق دجاج محشو بالخضار 2) أساور الدجاج بالجزر   خذي حبة جزر مقشرة ومرابيا خلطيها مع صدر دجاج مرحي معدنوس مقطع موطارد ملح فلفل اسود افاح زنجبيل شوية فرينة ثوم طازة او بودرة لهريسة للي يحب الحار خلطي كلش مع بعض  ثم شكلي أساور كيما في الصورة سخني الزيت واقليهم من غير ما تحطيهم في الفرينة  تكوني موجدة المرق وهي بصل ثوم ملح فلفل اسود افاح زنجبيل شوية فرينة شوية موطارد معدنوس زيت انا استعملت هنا اجنحة الدجاج  ملاحظة (ممكن تتسائلو على سر وجود الفرينة ولاموطارد في المرق الأبيض والله حبيباتي عن تجربة اكيد يعطيولو بنة ولون رائع للمرق الأبيض وجيك المرق خاثر بلا ما تضيفي حتى حاجة مع الأخير ) قلي مليح المكونات نتاعك على نار ذليلة ثم أضيفي حبيبات زيتون اخضر بلا علف ومقسومة الحبة على زوج و كمية من الح** (استعملت الح** ال**بر طري وبنين وبالخف يطيب ) ثم امرقي وخلي الدجاج يطيب نحي الدجاج وزيدي للمرق شامبينيو (فطر معلب) بعد ما تكوني ذبلتيه في شوية**دة وفلفل اسود وثوم بودرة ولوحي الأساور نتاوعك نتاع الدجاج و خليهم يكملو طيابهم وياخذو بنة المرق  قدميها بهاذ الطريقة وحطي الحشو اللي في المرق في وسط كل اسوارة وبالصحىة والراحة 3 قراتا بالخضر امممممم   في مقلا ما تلصقش حطي حبة بطاطا مرابيا حبة جزر مرابيا حبة جريوات مرابيا نصف حبة كرنب مقطعة بالطول رقيقة زيدي الزيت والملح وفلفل اسود وحطي على نار ذليلة وغطي ومرة على مرة حركي حتى تذبال ولازم تذبال مليح وتشوفي بلي الكرنب راه طاب ثم نحي من على النار  ي اضيفي كمية من اللحم المرحي يكون متبل وطايب وزيدي أيضاً كمية من زيتون اخضر بلا علف ومقطع دوائر وشوية معدنوس ودبشة مقطعين رقيق كمية من الفرماج رابي وقطعة فرماج شاف افاح وزيدي شوية فلفل اسود 1م ص خميرة الحلويات  ومن بعد حضري لابيشاميل انا نستعمل طريقتي الخاصة ساهلة خلاص خذي زوج كيسان حليب بارد زيديلو اربع ملاعق كبار فرينة ملح فلفل اسود ثوم بودرة او ثوم طازج زنجبيل وشوية جوزة الطيب مبشورة وزوج قطع فرماج لافاش كيري وحطي على النار وحركي مليح حتى تثقال نحي من على النار وزيديلها قطعة صغيرة من ال**دة وحركي حتى تذوب  فرغي لابيشاميل على الخليط اللي عندك وقلبي من فوق لتحت حتى يتخلط كلش ذوقي الملح اذا احتاج اضيفيهنا كلش راه واجد  خذي مول خاص بالكيك تدهنيه مليح بال**دة ورشي عليه الخبز المرحي ومن بعد فرغي الخليط نتاعك والى الفور حتى تنشف ما تخليهاش طول بزاف باه ما تتحرقش من الاسفل وقدميها بالصحة والهناء ملاحظة من الأفضل تتكل وهي سخونة 4 بوراك على شكل كورني بالخضار   في مقلا ت ما تلصقش حطي شوية زيت وحبة بطاطا مرابيا وحبة جزر مرابيا وحبة جريوات مرابيا قليهم مليح على نار ذليلة وغطائهم مرة على مرة حركي حتى تشوفيهم طابو اضيفي الملح الفلفل الأسود لفاح زنجبيل نحي من على النار و اضيفي الفرماج المرحي وقطعة من فرماج شاف مقطع و بيضة مغليا ومرابيا وصفار بيضة نية واذا كانت الكمية كبيرة استعملي بيضة كاملة بلا طياب و1م ص موطارد وعصير نصف حبة ليمون معدنوس وثوم من الاحسن ثوم بودرة وممكن اختي الكريمة تضيفي زيتون اخضر او اسود مقطع رقيق الإضافات ترجع لذوقك الخاص والى الشيئ اللي موجود في البيت ثم خلطي بالملعقة من فوق لتحت  خذي ورقة البوراك تطويها على زوج ثم ضعي كمية من الحشوة على الجنب بشكل مائل ولفي على شكل كورني كيما في الصور لصيق الجانب ب بياض البيض وزيدي عمري بالحشوة من فوق في نهاية الكورني وما تخافيش ماراحش يخرج في الزيت كي تكوني تقلي فيه  اقليه في زيت سخون حتى يحمار ضعيه على ورق ماص للزيت ثم ادهني الكورني من فوق بالمايونيز او فرماج طري ثم ضعي بيض مغلي ومرابي وممكن تضيفيلو معدنوس مقطع رقيق او فرماج رابي او زيتون اسود مقطع رقيق كييييييييييما تحبي الشكل راااااائع والبنة اروع صدقيني وثاني نغيرو شوية من البوراك اللي متعودين عليه 5 رولي بالخضار في الفور روعةةةةةةةةةةةةة   في صحن عميق حطي حبة بطاطا مرابيا وحبة جزر مرابيا وحبة جريوات مرابيا 4بيضات معدنوس ملح فلفل اسود فرماج رابي نصف م ص خميرة القاطو افاح زنجبيل كمون 1م ص هريسة شوية زيتون اخضر مقطع حلقات نخلط كلش مع بعض  نحط في بلا ورق ال**دة او كيما يسميه البعض ورق الطهي ونزيد ندهنا بال**دة نفرغ الخليط فيه ونعدلو مليح بالملعقة ثم الى الفور حتى ينشف ويحمار شوية من الاسفل ما ياخذش وقت طويل في الطياب بعد ما يطيب خليه 5 دقايق ومن بعد اقلبيه فوق طرشون مبلول شوية انا حبيتو يا خذلي بنة لاموطارد ادهنتو كامل بيه ( ممكن تستغناي انتي على هاذ لاموطارد) غطيه باللحم المرحي يكون متبل وطايب ثم ضعي عليه شرائح الفرماج تعطيه بنة روعةةةةةةةةةة اذا ما عندكش استعملي فرماج عادي ثم رولي غير بالشوية ثم هزيه وحطيه في مول وأطلي السطح نتاعو بصلصة الطماطم اللي تحبي انا عندي وصفة نديرها وما نبدلهاش نحط في طاولة طماطم مقطع مكعبات نضيفلها شوية طماطم **برة شوية هريسة ثوم ملح فلفل اسود كمون فاح زنجبيل توابل الكاري دبشة ورق رند زيت وشوية ماء وحطيتها طيب بعد ما تغطيها مرة على مرة خلطيها ثم ارحيها بعد ما تنحي أوراق الرند جات فيها بنة رهيييييييييية ورااااااائعة المهم بعد ما تغطي سطح الرولي بصلصة الطماطم حطي عليه فرماج رابي من فوق ولوحيه دقائق في الفور   قطعيه دوائر وقدميه لعايلتك بنة ولا اروع 6 عجة الخضار بالبيض   كي العادة خذي حبة بطاطا مرابيا حبة جزر مرابيا حبة جريوات مرابيا ذبليهم مليح في الزيت والملح وفلفل اسود على نار ذليلة و ماكيين ومرة على مرة حركي حتى طيب وتذبال نحيها من على النار اضيفيلها فرماج مرحي جبن طري نتاع بربار او شاف معدنوس ودبشة ثوم بودرة لفاح كمون وزدتلها فلفل اسود وزنجبيل وانتي والإضافات اللي تحبي ممكن طن نتاع الطماطم ممكن زيتون ممكن جاج طايب ومرحي وجدي 4 او 5 بيضات مضربين ديريهم شوية فلفل اسود وملح وشاة ماء وخلطي ثم فرغي مع الخليط وخلطي ادهني مقلة ما تلصقش بالزيت او ال**دة حطيها تسخن شوية ثم فرغي الخليط نتاعك وغطي ونقصي للنار وخليها حتى تنشف وتحمار من تحت ثم اقلبيها في صحن بحجم المقلا وعاودي ادهني المقلا نتاعك رجعيها الى المقلا وزيدي خليها تحمار من الجهة الاخرى   ثم قدميها مزينة بنة تهبل وراح تعجبك اكيد 7 ليكراب بطريقة رائعة   خذي نصف لتر حليب اضيفيلو 3 بيضات شوية ملح وفلفل اسود ثوم بودرة شوية زنجبيل مرحي طرف صدر دجاج صغير طايب مسبقاً في صوص بيضاء او حمراء شوية 1 م ص موطارد 1 م ص هريسة و5م ك فرينة معمرين مليح وخلطي كلش مليح وخليه في الثلاجة مدة ساعة  او استعملي اي وصفة كراب معتامدتها انتي سخني مقلات خاصة بليكراب وزيدي ادهنيها بشوية زيت وفرغي مقدار مغرف وحركي المقلات نتاعك حتى يأخذ شكل قرصة لما تطيب من جهة اقلبي على الجهة الاخرى وهكذا حتى تكملي كل الكمية  قطعي دوائر بحجم لي زانبوغت بياس نتاوعك اللي راح طيبي فيهم وخليهم بجنب وحضري الحشوة رابي حبة بطاطا وحبة جريوات وحبة جزر في مقلا مع شوية زيت وغطي وعلى نار ذليلة ومرة على مرة حركي حتى طيب مليح نحي من على النار وزيديلها فرماج رابي وقطعة فرماج طري ملح فلفل اسود ثوم بودرة لفاح معدنوس و2 روس فلفل حلو مقلي ومقشر ومقطع رقيق خلطي كلش مع بعض  خذي لي زامبوغت بياس حطي في اسفلهم 2 دوائر من ليكراب اللي درتي من قبل وحطي الحشوة ثم 2 دوائر ثم الحشوة ثم لي كراب من فوق صبي عليهم لابيشاميل اللي تكوني محضرتها من قبل ثم حطي شوية من الحشوة الي بقات ثم فرماج مرحي والى الفور مدة نصف ساعة حتى لعشرين دقيقة  نحيهم وحاولي تنحي بحاشية الموس من على الجوانب قبل ما تنحي لي مول نتاوعك وزيني بفلفل حلو مقلي ومقطع بالطول صدقيني بنة راااااااائعة وذوق أروع 8 سلاطة بالخضار   حضري المقادير اللي في الاسفل كل واحدة بجيه 1)خذي حبة جزر وحبة بطاطامرابيين ( في هاذ الوصفة استغنينا على الجريوات ) ذبليهم مليح في مقلا ولما تشوفيهم طابو نحي من على النار وجدي الصوص وهي حطي في حاجة غامقة طرف فرماج طري 1 م ك كرام فراش 1 م ك مايونيز 1 م ك موطارد ملح ثوم بودرة فلفل اسود 1 م ك خل. 3 م ك زيت شوية معدنوس حبات زيتون اخضر وميكسي كلش مع بعض بالبرا ميكسور ثم خلطي مع الجزر والبطاطا اللي كنتي ذبليهم وأضيفي2 باطات طن نتاع الزيت ويكون مقطر من الزيت نتاعو  2) غلي روز مع شوية جلبانة وملح وخليه يقطر مليح ثم اضيفيلو طن نتاع الزيت مقطر من الزيت نتاعو وصوص فينيقرات ومايونيز 3) غلي مقرونا في الماء والملح وشوية زيت ثم قطريها اضيفي لها ماييز طن زيت فلفل اسود معدنوس مقطع زيتون اسود مقطع زيتون اخضر مقطع حلقات فرماج قريار مقطع بيضة مرابيا صوص فينيقرات حبة طماطم مقطعة رقيق نصف حبة خيار مقطع رقيق و1م ص مايونيز وخلطي 4) على ورق ال**دة ويكون شوية مدهون بالزيت حطي كمية من الفرماج المرحي على شكل قرصة وأدخلته الى الفور سخون وخليه مدة 5 د لما تنحيه خليه غير شوية برك يشد روحو اقلبيه على ضهر كاس وشكليه شغل صحن ودخليه للثلاجة يحكم روحو  كلش راه واجد زيني السلاطة نتاعك كيما تحبي وبالشكل اللي يرضيك التشكيل  شوفي الصور والبنة واللذة نضن راهي واضحة ههههههههه:1: 9 قوارب البطاطا المحشوة بالخضر والمرقاز   خذي حبات بطاطا قشريهم واغسليهم ثم اقسمي الحبة على زوج بالطول ثم فرغي اللب نتاعها تتحصلي على شكل قوارب اقليهم مليح في الزيت من كل الجوانب حتى يحمارو اكيد بعد ما تملحيهم ثم ذرذري عليهم فلفل اسود وكمون ولفاح وخليهم بجيه الحشوة فرغي حبات المرقاز في مقلات وقلبهم مليح حتى يخرج الشحم اللي فيهم ثم نحيه وفي نفس المقلا وفي هاذاك الشحم رابي حبة بطاطا وحبة جزر وحبة جريوات وذبليهم مليح وغطي وعلى نار ذليلة ومرة على مرة حركي حتى طيب نحي من على النار ثم لوحي المرقاز الي كنتي طيبتيه من قبل وشوية دبشة فرماج رابي وفرماج طري ملح ثوم بودرة فلفل اسود كمون لفاح هريسة وخلطي كلش مع بعض  ثم عمري القوارب نتاع البطاطا اللي قليتي من قبل تكوني موجدا صوص تومات من قبل فرغي الصوص في بلا حتى للنصف وحطي البطاطا نتاعك ثم استقيها شوية بلاصوص اللي تبقى ذرذري فرماج رابي وغطي بورق الالمنيوم ولوحي في الفور حتى تكمل طيابها مرة على مرة طلي عليها حتى طيبت البطاطا مليح  وقدميها مع شرائح البطاطا اللي نحيتي من قبل وتكوني قليتيهم بعد ما تملحيهم تتحصلي على شرائح شبه امممم شحال بنان والله طبق رائع والطعم اروع جربي وان شاء الله ما تندميش شوفي الشكل شحال شباااااااب وهاذا محشي الجريوات جربتو وصراحتاً ما عجبنيش الذوق نتاعو لهاذا فضلت اني ما نحطش الوصفة الصورة جميلة لكن الذوق ياااااااع  هاذا ما في جعبتي حبيباتي نتمنى ما نكونش طولت عليكم بالكتابة والصور فقط حبيت نشرح ونوضح باه الفكرة توصل بسهولة لمخاميخكم كيما قالتها العسل ام تاااااااجو راني عصرت مخي ونفذت وأبدعت واكيد الموضوع مفتوح اذا جاتني فكرة اخرى راح نحطها في أمان الله حبيباتي :1::D:Dخصني غير ندير حاجة حلوة بالخظر:D:D:1: ??????? ??????: روااااااااااائع ...........من مطبخ اسمهان 79 || ??????: ahlam1399 || ??????: اسم منتداك
|
|
|
العرض الشجري