|
|
#1
08-11-2016, 11:38 PM
|
|||
|
|||
فن التعلق بالذكريات
<div>  المواطنة ( باتريشيا لورنز ) كتبت فـ كتاب ( the speaker's sourcebook ) إنها وهى فـ أولى جامعة كلية فنون قسم رسم سنة 1963 لقت فـ كومة اللبس اللى كانت أمها بتجهزها عشان تديها للفقراء قميص أصفر فضفاض له أربع جيوب كبيرة مطرزة بخيط أسود .. حاجة كده شبه العفريتة بتاعتنا .. القميص كان باهت وماكنش جميل بس شكله مفيد .. " باتريشيا " طمعت فـ القميص ومسكته فـ إيدها وقررت تحتفظ بيه وقالت بينها وبين نفسها هينفعنى وأنا برسم فـ الكلية لو لبسته فوق الهدوم عشان الألوان ما تطرطش عليها .. أمها شافتها وهى ماسكاه وفهمتها إن القميص ده عزيز عليها وقالتلها : ( لقد أرتديت هذا القميص عندما كنت حامل فى أخوكِ سنة 1954) .. بنتها سمعت الكلام من هنا وخرجته من هنا وضربت ع القميص طبعاً .. من وقتها والقميص ده بقى جزء مهم فـ حياة " باتريشيا " ومش بيفارق دولابها . . قعد معاها كل سنين الكلية ولحد مشروع التخرج ! .. وزى عادة الناس فـ أمريكا لما انفصلت عن أسرتها بعد الكلية وراحت قعدت فـ مدينة " دينفر " فـ شقة لوحدها .. خدته معاها برضه وكانت بتلبسه كل يوم سبت وهى بتنضف البيت .. جيوب القميص الأربعة اللى أتنين منهم ع الصدر وأتنين ع الفخذ كانوا مكان مثالى عشان تشيل فيه حتت القماش اللى بتنفض بيها التراب .. القميص مع الوقت بقى شاهد ع أغلب لحظاتها الحلوة ومع الوقت برضه بقى فيه بينها وبينه علاقة حب مش مفهومة .. اتقطع من تحت الباط فـ خيطته وكملت إستخدامه عادى جداً .. اتجوزت فـ السنة اللى بعدها وخدته معاها فـ بيت جوزها .. فـ السنة اللى بعدها بقت حامل وبقى القميص ده هو اللبس المثالى ليها فـ فترة الحمل .. بتقول عنه : ( كان القميص يذكرنى بدفء العائلة وحمايتها؛ لقد تولدت بينى وبينه صلة عميقة .. صلة حب ) .. بعد ما ولدت قالت لـ نفسها كفاية رخامة بقى أكيد أمى محتاجاه ؛ فـ غسلت القميص ونضفته وكوته وحطته فـ كيس وبعتته لـ أمها فـ المدينة اللى هى فيها .. نسيت الموضوع تماماً .. مر 3 سنين .. خلفت عيل تانى ثم عيل تالت .. راحت تزور أمها وقضت معاها 4 أيام هى وولادها . . وهما ماشين أمها إدتهم كارتونة كحك كبيرة .. لما وصلت بيتها فتحت الكارتونة لقت الكحك + القميص الأصفر ! .. " باتريشيا " اتطلقت .. سابت البيت لـ جوزها ومشيت هى والولاد عزلوا فـ شقة جديدة .. لبست القميص فوق هدومها وهما بيعزلوا عشان الدربكة والبهدلة والمرمطة .. أمها جت زارتهم وقعدت معاهم شوية ولما سافرت أكتشفت إن " باتريشيا " حطت لها القميص فـ شنطة العربية ! .. أمها ترجعهولها مع لوكشة هدوم جديدة جايباها لـ أحفادها .. " باتريشيا " تروح تزورها وتسيبه لـ أمها جوه البوتجاز .. أمها تبعتهولها محشور وسط شجرة كريسماس السنة الجديدة .. دى تستخدمه شوية وتبعته للتانية والتانية هكذا .. إنتى محتاجاه .. لأ إنتى اللى محتاجاه .. أستمرت اللعبة اللطيفة دى بينهم 10 سنين كاملة ! .. " باتريشيا " إتجوزت تانى .. فـ يوم فرحها وهى بتستعد تركب العربية مع عريسها لقت أمها مخيطة القميص ولزقاه على الكنبة بتاعت العربية وراسمة عليه بالخيط قلب أخضر ومكتوب جواه بخيط أحمر ( أحبكما ) وكانت أحلى مفاجأة .. " باتريشيا " عرفت بعد كده إن أمها كانت مريضة بـ تصلب الشرايين وكانت مخبية عليها .. ماتت بعد فرح بنتها بـ شهرين وماشفتهاش من يوم الفرح عشان كانت فـ شهر العسل .. فضل القميص مع " باتريشيا " وفضلت علاقة الحب بينها وبينه اللى محدش قدر يفسرها .. بالمناسبة بنت " باتريشيا " كبرت ودخلت كلية فنون جميلة وأتخصصت فـ الرسم؛ وبدأت علاقة حب جديدة ومش مفهومة بينها وبين القميص الأصفر اللى لقته فـ دولاب أمها ? فيه علاقة حب مش مفهومة بينا وبين حاجات كده متقدرش تعرف سبب لها غير بس إنك بتكون مرتاح معاها .. ( أماكن ، لبس معين ، برفيوم ، ناس ) .. كل واحد فينا له علاقة مرتبطة بـ ذكرى مع حاجة مش بتفارقه ومهما شاف اللى أحسن منها برضه بتفضل فـ عينه الأفضل .. عندى 4 بنطلونات سودا؛ منهم بنطلون أسود بالذات بحبه جداً أنا نفسى مش عارف ليه ! .. لو تخنت شوية بروح أوسعه ولو رجلى خست بروح اضيقه ! .. أعرف واحد بيكلم عربيته لما بتعطل ويوشوشها : ( والنبى ماتعمليها معايا؛ عشان خاطرى دورى ) فـ تدور ! .. الكاتبة " تسنيم المذكور " قالت : ( العلاقات لا تقاس بطول العشرة إنما بجميل الأثر وحلو الذكريات ) .. اعملوا ذكريات ع قد ما تقدروا ومع أى حد وأى حاجة؛ هو ده اللى بيبقى .. الذكريات المؤلمة بتتنسى مع الوقت .. الذكريات الحلوة بتعيش .. " أنيس منصور " قال : ( خذي ملعقة من الذكريات الجميلة، وملعقتين من الاحلام السعيدة وملعقة كبيرة من النسيان واخلطيها جميعا في كوب الابتسام- واشربي المحلول ثلاث مرات يومياً ) بقلم : تامر عبده ال**در: منتدى المرأة والطفل - جنى النسائية - من قسم: يحكى أن .. tk hgjugr fhg`;vdhj
|
 |
|
|
العرض العادي
