|
|
#1
07-28-2016, 02:29 PM
|
|||
|
|||
اسبوعيات بريه النقاد ? 3 ?
Tweet  .. بدايتن اعتذر عن خطيتي تساني أزعلت أحد بحتسيي ، بس والله أنا ماقصدي غير أوريكم بعض المنغصات علينا بحبيبتنا بريدة ، فتكفون لاتزعلون علي ، افرحوا ان بوه مثلي يشاور لكم على مايحوس شغلكم . .. يقولون في إحدى الدايرات اللي عليها العلم ، يقولون أن مديره الأول يديره للحين ، وهم تقل أنهم متوكدين ، لأن شغلهم ماتغير ، لاطموح ولا تجديد ، يعني تسنك يازيد ماغزيت . .. ما ادري وين دين أهل بريدة ، أجل حريم تلاحق حقين السناب ، والله ياضيقت صدري تسلمتن قالها واحد : الرجال تجدع حريمها عشان تصور معهم ، مسببين لنا ربشة ، واللي يقهر ويبط التسبد ، الأمن ينظم لهم التجمهر . .. ما ادري وش جاه الناس تركض ورا هالسناب ، ولايهمهم مايستوجب عليهم من غطاء الحريم ومنع اختلاطهن ، والله يامنول ياللي يحوم حول الحريم يمحطونه تمحيط ، أوما الحين ، الحريم اللي يبن تمحيط . .. تنصدم لما تشوف حريمنا بهالمهرجانات ، وهن ارتخن ، أهم شي يصورن ، وان جيت تحتسي ، قالوا لك انت متحجر . .. كل مهرجان ببريدة ولو ماله دخل بالحريم لازم يحطون لهن فعاليات ، تقل أنهم ودهم كلشي يكون للحريم ، تجي مهرجان تسوق تلقاهم حاطين فعالية للحريم وخذ عاد اختلاط . .. وعلى طاري المهرجانات ، حتى مهرجان التمور وهو مهرجان تسويقي ، حاطين فعاليات للحريم ، وطبعا فعاليات الحريم بيسير عليها مشاهير السناب ، وخذ صراخ وملاحقهم ، ودي أدري وش دخل مهرجان التمور بالحريم . .. الغريبة سمعت أن المباسط بسوق التمر صارت بدراهم ، يعني مهناش بسطات ببلاش ، وشلون تسذا ، ووين تشجيع الشباب . .. إذا بتشوفون مطاريس الشغل ، شوفوا طريق التشليح ، صدز ، مطرسة مابعدها مطرسة ، تقل إدارة الطرق بتسكتنا بوه ، وين مواصفات وإبداع الطرق يومنه تحط شوارع تهبل . .. ماادري احس ان الدعوة منتالي بربسة ومطرسة ، ماعادنا نشوف شين خلص وزان ، كلش شغلهم شلشلة ، والله مانشوف شارع عليه العلم ، واللي يقهرك مقاول حاسه وخربه عشان حفريته ولارجعه مثل اول ، حتى تلقى رصيفه او شجره حايسعن حاس الله مريره . .. قال المدير العام ، وشدد المدير العام .. وحنا مابلانا إلا اللي يطبلون للمدير العام ، حقين الصحة نسموا بنا بأخبارهم ، والله يامديرهم العام مانافعك غير الذكر ا***ن ، خل عنك ذولا ، وشف لنا احتياجات مستشفياتنا ، ترا ماعندنا دكاترتن عليهم العلم . .. اترك عنك شدد وارتخى ، بدل طنزة الناس بالتخرصي ، خلهم يفتخرون إن عندهم تخصصي ، ورنا سنعك وأنت قده بالمركزي ، خلنا ندخله ونرفع روسنا مب ندلزهن طالعين خايبن رجانا . .. موب يحاتسوننا عن الثقافة المرورية ، طيب وش عندهم المرور والدوريات اذا جو عند الاشارات ولعوا سفاتيهم وقطعوها واذا تعدوها طفوها ، يعني هم معصومين . .. يحليلها الأمانة تشدد على واجهات المباني حقت الناس ووجهات مبانيها تسنها حوشة غنم . يأمرون بمعروف وهم يخالفون . 
|
 |
|
|
العرض العادي
