ryan - رثاء الوالد رحمه الله *بقلمي*

رثاء الوالد رحمه الله *بقلمي*

السلام عليكم هذه الكلمات رثاء الوالد الله يرحمو 03-11-2009

يا تمحاني جرح الكية زاد عليا--- واتمحمح قلبي من كثر اجراحو

قيم الحرقة زاد بسحابو قطاني--- اقطع عني ذوك لمراسم راحو

احرم عني النوم و اهجر عينيا--- مقواهم على طول دهري ما ناحو

اسماطت كل طيبة في الدنيا--- واهزمني فراق الوالدين اللي راحو

يا تهواسي و الحرقة جات مع البكرة **** و الخداعة من بين لدين اداتو

انحس بقلبي قيوان على جمرة **** اتمحمح معصور بين اصفقاتو

ياوخذي كيفاش نعمل ذالعصرة **** صهدو دخلاني خرج زفراتو

يا خوتي لامن يفسر ذالنظرة **** ولا منام صعيب واعر شوفاتو

بقيت نشوف و نعاود فالخزرة **** مكذب في شوفتو جاهل مماتو

و اضياقت بيا الدنيا ذالمرة **** و تأكدت خلاص ذا وقت فراقاتو

وقت فراقك يا بوي لحظة مرة **** و اظلامت عنا الدنيا و اخفاتو

واش يصبرني في هاذ الخطرة **** واش ينسي ذالخيال و شوفاتو

اتعريت وراح برنوس السترة **** مقواني كيفاش ننسى صيفاتو

ادرق عنا زين الخيال مع الطولة **** و المبسم **موت قاع بضحكاتو

وينك ياذيك السمايم و الخزرة **** اقبرناهم قاع في اللحود اخفاتو

اتمسى سيدي هلال مع قمرة **** في ساعة مرة المرسم اخلاتو

حازن قلبي و الدموع على الشفرة **** و محماح الكبدة كثرو كياتو

هاهي دونك حالتي عالي القدرة **** اطفي ذالمشعال برد حرقاتو

ماجاتنا بالمال نفدو يا حصرة **** ماجاتني بجهاد نصعد عقباتو

ماجاتني بعلوم و قد مانقرا **** ولا فاد الجاه و انلم اجماعاتو

الدنيا من فراقك رجعت مرة **** و اسماطت أيامها بلا قعداتو

يا بويا راني نتفقد فالجرة **** و نتنهد لمراسمك و ارفقاتو

يا حصراه عليك يا زين النعرة **** يا عمار افجوج بطعام و مرقاتو

شهدت لك عروش في ذيك الدشرة **** مولى خصلة باينة بالخير املاتو

انتايا معروف فالتل و الصحرا **** يا مول الميعاد محلا سهراتو

لكن هذا أمر الله مالينا نصرة **** لا مبدل للقضا هاذو نفحاتو

اتبقى على خير من هاذ الساعة **** ما ننساش وصايتو مطيب كلماتو

يا حصراه عليك جرحك ما يبرا **** و جرح الفرقة تصعاب امداواتو

نطلب ربي خالقي طلبة حرة **** يغفر اجميع اذنوبو وما فاتو

بجاه العربي سيد فاطمة الزهرة **** من أهل الجنان يسكن جناتو

آآآآآآآآآآآآآآآآآآآآآآآآآ آآآآآآآآآمين

تمت يوم الخميس بقلمي 13-12-2009