خليني ناسي... -بقلمي-

[ahlam1399]

خليني ناسي... -بقلمي-
خليني ناسي خير من التفكار----لاتفكرني قيلني ساعف لحوال
حشمتك بالله لا تعود لخبار----لاتهوض لجراح مانفدو مازال

بعدني يهديك لا تكونش مكار----ضنيتك بلهوث اتفتش عالموحال
داوستك شحال من مرة تكرار----ياودي بركاك من كثرة لسوال

لا تنبش فالفايتة ليها أسرار----لاتحيي لي ذوك لحكايات اطوال
عييت نطاوع فيك ياهاذ الكيدار----ما تدي عبرة ولا بيتش تعقال

غرام الريم اللي مسريني لسحار----مانرقدش الليل يجيني كالخيال
دهشني ذالقلب ويزيرني تزيار----حاتمني بالسيف الصهد المشعال

توحشت كحيلة العين و لشفار----و شوفتها تنسي في الهم و لعلال
هي طبي و اشفايا من لضرار----هي حبي وتجارتي و راس المال

واش يصبرني عن ريمة لوعار----عشقي و غرامي ماعندو مثال
فرقتنا ليام و حدتنا لقدار----عمري ماننساك ع الدهر وما طال

ياوناست خاطري هذا ماصار----ما هوشي قرضي نطول ذاتطوال
اهجرني قلبي واسمح فيا طار----وخلالي ذ الفريسة عنها ما سال

و اتشتت حالي وكثرو لي لفكار----وحدثني عقلي حديث نتاع هبال
ماصبتش حيلة ونطير مع لطيار----ماعندي جنحين ونطوي ذلهوال

ياسمرة مكتوب ربي عنا صار----و كي ما راد الله في حكمو مازال
هاذ الشي امسطرفي شاوالأعمار----ولابدة ويجي نهارو في التيجال

ياقلبي يهديك ربي كون صبار----لاتقصبشي ياك الصابر راه ينال
و المكتوبة ياك تراها لبصار----و القسمة من عند ربي لا تبدال


تمت بقلمي يوم 27-04-2016
medcherif03