جيل ابو بطوله ( تعديل )

[rss]

جيل ابو بطوله ( تعديل )
يقولون السبب المدرب .. والمدرب ماجاء إلا امس ..

نفس جيل النصر اللي قبل الجيل الحالي غير قادرين على المنافسه ..

ويشكون من المدرب ما يبغون الانضباط ..

غير ان المدرب ناوي يشيل كثير من اللاعبين زي ما شال بعضهم وقال اكثر من مره محتاج لاعبين ورفض التوقيع بمبالغ كبيره مع بعض اللعيبه يقول ما يستاهلون واللعيبه هذولا ما لقوا انديه وانجبروا يوقعون عقود أقل من اللي كانوا طالبينه .. المشكله انهم صرحوا انهم بيتركون النادي بس في النهايه مالقوا انديه ***اهم ووقعوا مع انه كان فترة انتقالات ..

هذا الشي لحاله يكفي انهم يشتكون منه .. ويشنون عليه حرب ..
حرب داخل الملعب وخارجه (حتى عند الدكه) .. نفسيه واعلاميه .. شارك فيها لاعبين .. واذنابهم في النت .. واعلاميين كنا نحترمهم بس الدنيا **الح ..

وطبعا الحرب هذي فرصه لأعداء الاداره ولأعداء الكيان ككل واستغلوها ..



اتوقع الاداره عشان تخفف الضغط عنها راح تشيل بيتوركا ..

أول شي أتوقع يقدرون يلغون العقد بدون شرط جزائي خلال فترة الصيف فقط ..

ثانيا : مدرب جديد الصيف يعني لازم ياخذ وقته أقل شي لفتره الشتويه بدون ضغوط على الادارة .. ولو استمر بيتوركا بيكون على الادارة ضغط كبير الموسم القادم لو الاتحاد ما بدأ بدايه ممتازه ووقتها بتكون اقالة المدرب وجلب مدرب جديد مكلفه من جميع النواحي ..

ثالثا : الادارة ما نظفت النادي دفعه وحده وبشكل كامل ونهائي خوفا من ردة فعل الجماهير و بسبب الظروف المادية اللي ماتسمح بتعويض الجماهير وامتصاص ردة فعلهم بعد تسريح نجوم الورق .. والنتيجه الادارة الآن تحت ضغط وإلغاء عقد المدرب هو الحل المؤقت لتخفيف الضغط ..


لو سوتها الادارة بتكون غلطت غلط كبير .. الاستقرار والانضباط مطلوبه بشكل كبير في هذا الوقت .. بقاء بيتوركا يعني بقاء اثنين أو ثلاثه من الأجانب ويبقى فقط تسريح خمسه أو سته لعيبه ( مو أي خمسه سته بعضهم مستواه مقبول بس لازم يمشي ) وجلب ثلاثه أو أربعه محليين وتصعيد بعض اللعيبه الصغار .. وبيصير عندك فريق قوي ..

والمدرب قاعد يتأقلم ويستجيب لطلبات الاداره .. خفف التمارين ومعسكرات الفنادق .. واللعيبه مثل ماركينهو ومختار يستفزونه علني ويتسامح معاهم .. ويوم جاء كان يجرب ويلعب تركي الخضير وابو سبعان ودغريري والقميزي وغيرهم وفي آخر المباريات بدأ يستقر في التشكيل وواضح انه فهم الفريق وأمس شفنا تشكيلته أفضل الموجود ..

بس اللعيبه ناوينه ..


والاداره لازم تفكر قبل توصل مفترق الطرق .. وتختار بين مدرب ينظف لها الفريق من الشلليه .. ويبني فريق منضبط ومحترف .. وكلها سنه ويمشي ويقدرون يحطون تبعات مرحلة التنظيف في راسه .. والشله في الفريق يكونون عبره للي بعدهم .. وتتفضى الاداره في الصيف لعقود الرعاية وبعدها لأعداءها من خارج أسوار النادي سواء من أعضاء شرف أو غيرهم ..

أو ترضخ للضغط اللي يمارسه عليها أعضاء شرف وإعلااميين وجزء كبير منه بسبب اللعيبه .. وتختار اللعيبه .. والضغط بنفس الاسلوب ممكن يتكرر مره ثانيه وثالثه ..

والله يصلح الحال ..