أنا والكوافيرة والماكييرة وقراري الأخير

[rss]

أنا والكوافيرة والماكييرة وقراري الأخير
السلام عليكم ...


يوم يكون عندنا عرس في العايلة .. اضطر إني أحجز غرفة في الفندق عشان أوفـّـر وقت في التجهيز ..
وجرت العادة إني اتصل في كوافيرة وماكييره أعرفهم من زمان عشان أتعدّل في الفندق ..


مع الوقت حسيت انهم في كل مرة يزيدون عليّه السعر !! :10:

الـ 500 درهم استوت 600 درهم
وبعدين نقزت الى 700 درهم
ومؤخرا استوت 800 درهم !!

اتخيلوا 800 درهم بس تسريحة و800 درهم مكياج للحرمة الوحدة !

ورغم اني أنا **ونتهم واتعامل وياهم من سنين !
المفروض ينزلون لي السعر وخاصة اني ما أكون بروحي
يعني نكون حوالي 4 أو 5 حريم !

آخر مرة كان عندنا عرس .. وأنا كنت محتارة شو اسوي بخصوص الكوافيره والماكييره !


فبالصدفة شفت ربيعتي في مناسبة .. تسريحتها مرتبة ومكياجها ناعم وخفيف
سألتها منوه سوالج عدولج ؟


قالت لي عن صالون عادي في بناية جديمة أنا أعرفه ، بس من سنين ما سرت له
وانهم يايبين عاملات يداد !

فسألتها عن السعر فقالت لي : تسريحة ومكياج 350 درهم !!!!!

يا بلاش !

وطلع الصالون بالصدفة عدال الفندق اللي بيكون فيه عرسنا .. تقريبا بيننا وبينهم شارعين ..

فقلت خلاص بأخليهم ييوني الفندق !


اتصلت بالصالون .. وخبرتهم عن الموعد واني أبغي كوافيرة ومكييره ييوني الفندق
فقالت لي : 1300 درهم !!!!!! :6:

أول شي أنا اتحريت انها تقصد ***ي 1000 درهم زيادة عن سعر الشغل
وهالألف شاملة عددنا كلنا (كنا 3 أشخاص)

فقلت من حقها !

قالت : لا ! 1300 درهم عن كل وحدة !!!!! :10:

يعني الصالون عدال الفندق .. السعر في الصالون 350 درهم وفي الفندق 1300 درهم ؟!!!

شي ما يدخل العقل !!

لا وبعد هم في بناية جديمة والإيجار أكيد ما ارتفع ! :10:


حسيت انه المسألة استغلال
واننا نحنا اللي فاتحين لهم مجال انهم يرفعون الأسعار بصورة مضحكة
فقلت لها خلاص ما دام الصالون عدال الفندق نحنا بنييكم !


اتصلت الفندق عشان أحجز ..
طلعت الغرفة 900 درهم والجونيور سويت 1200 درهم !!
يعني اتخيلوا ! الجناح أرخص من التسريحة والماكياج في الفندق !! :15:


فقلت عيل بأدلّع عمري وبالسعر اللي كنت ناوية أييبهم به بأحجز لي جناح أحسن ! :32:

وقررت إني من اليوم ورايح : أسير الصالون وأوفـّـر على نفسي
ولا هالاستغلال غير المبرر !